الأربعاء، 24 يونيو 2009

Splatter House PS3...يا ماسكاتك "جمع Mask" يا عم Rick




أنا لما عرفت أن Splatter House حيتعملها جزء جديد علي PS3 , كنت فعلا مبسوط جدا لأن أسم زي ده خسارة كبيرة جدا أنه مستمرش علي أجهزة الSecond Generation , في زكريات كتير قوي للعبة دي معايه و يمكن لو في حد من الold school gamers حيفتكر الSega Genesis و Super-Nes و أجهزة ال16-bit و أكيد برضه حيفتكر اللعبة اللي عملت ثورة في ألعاب 2D side scrollers فلوقت ده.




قصة اللعبة عن ولد بيدرس فلجامعة Rick و صديقته Jennifer بيتعرضوا لهجوم من زومبيز، بيخطفوا Jennifer و يسيبو Rick بيموت.
بيسمع Rick صوت بيكلمه و بيطلع أن الصوت ده مصدره قناع سحري ، بيعرض عليه أنه يديله قوه خارقة حتساعده أنه يرجع Jennifer و يحارب الزومبيز. 



بيلبس Rick القناع و يبدء يروح قصر Dr.West اللي الزومبيز خطفو Jennifer فيه. مين Dr.West ؟؟ ده يا سيدي الدكتور اللي بيتدرسلهم فلجامعة "علشان تحمد ربنا علي دكاترة الجامعة بتوعنا:) "

شركة Namco اللي هي مؤسسة لللعبة ، فكرت بذكاء شديد إزاي حتعمل Remake لللعبة يتماشي مع الجيل الجديد من الكونسولز. تم الأتفاق مع شركة Surge لتطوير اللعبة " الشركة دي عملت لعبة Afro Samurai , و أنا في رأي أنها نجحت في أنها تعمل موشن أكتر من رائع فلعبة أفرو و متوقع أداء كمان أعلي فلعبة Splatter House "





أستخدام المحرك الفزيائي Havok من أكتر الخطوات نجاحا فلموضوع ، أنت ممكن تكسر أي حاجة بأي حاجة لدرجة أنك حتقطع من الوحوش أجزاء تستخدمها كسلاح ، و طبعا الFinish Moves حتبقي موجودة و Surge قدرت تضيف للعبة Afro الكتير عن طريق الFinish Move اللي كان موجود فللعبة و أكتر حاجة مميزة فيه أنه بيتماشي مع باقي الحركات بسلاسه.

من المتوقع أن Splatter House حتبقي من أكتر الألعاب دموية لعام 2010...أيوة لسه بدري :( و أعتقد أنهاحتبقي من أكتر الألعاب نجاحا علي أجهزة الجيل التالت ، و أسيبكم مع الصور 






و للفيديو برجاء الضغط هنا

الاثنين، 1 يونيو 2009

ريفيوهات الألعاب


Kill Zone 2


النهاردة أنا إن شاء الله , عامل تقرير عن لعبة كيل زون تو و طبعا اللعبة دى واحدة من أوراق شركة سونى لكسب سباق الكونسولز مع نينتندو و مايكروسوفت..

اللعبة كبعا معروفة من بى أس تو وكان أول جزء ليها كيل زون و بعد نجاح اللعبة , أتعمل جزء تانى بس على جهاز بي أس بي و كان أسمه كيل زون ليبراشين, و أستكمالا لمبدء "السبوبة" عملو جزء تالت أسمة كيل زون تو.



و علشان الناس اللى بتهتم بموضوع القصة و ملعبتش الأجزاء اللى فاتت متتخضش و تنزل تشترى بى أس تو و بى أس بى علشان تتابع اللعبة . القصة سهل جدا أنك تفهمها من كيل زون تو من غير ما تلعب باقى الأجزاء " شوف بقى يا عم أنا وفرت عليك كام بلكلمتين دول , أيدك بقى على 10% "...

المهم طبعا إن اللى لعب الأجزاء التانية هيبقى عنده خلفية عن الشخصيات و موضوع اللعبة .


طيب "ايه بقى الموضوع ؟؟ "

الناس فلمستقبل توسعت و بدئت تسكن كواكب تانية " و ساعتها حنكون أحنا لسة محشورين فلقاهرة برضو !! أيوة يا حبيبى متبصش على غيرك "

قررت الناس أنها تكون مجموعة دفاع كونى أسمها أي أس أيه و مقرها كوكب فيكتا. فى كوكب أسمه هيلجان و الكوكب ده الناس اللى ساكنة عليه على مر السنين و نتيجة الظروف البيئية الصعبة على الكوكب حصلها تشوهات و بقت أقوى و أسرع من الأنسان العادى , و عشان تقدر تعيش على الكوكب بتلبس المسكات الجميلة اللى فلصورة " متوفرة بجميع المقاسات و الألوان ما عدى اللون الفوحلقى لنفاذ الكمية " و أسمهم هيلجاست .

قائد هيلجاست أسمه فيزارى قرر أنه يحتل العالم و بدء بحرب مع أي أس أيه على كوكب فيكتا .
و أنتهت الحرب بفوز أى أس أيه و رجوع هيلجاست لكوكبهم " و يا دار ما دخلك شر "



تبدء من هنا قصتنا فى كيل زون تو و المشهد الأفتتاحى لراجل " ما شاء الله واكل أكل إخواتو التسعة ده إن ماكنش أكلهم شخصيا !! "




طب السؤال المهم هنا , ليه أختارو الراجل ده للمقدمة

أ – علشان شكله حلو " لأ طبعا , لأن وشه يقطع الخميرة من البيت "
ب – لأنهم كانو مازنوقين فكومبرس " لأ برضه "
ج – لأنه فيزارى قائد الهيلجاست " برافو عليك , تنفع جيمر "

المقدمة لفيزارى و هو بيلعن أستعداده للدفاع عن كوكب هيلجان من هجوم الأى أس أيه .

حضرتك حتلعب بسيف و هو واحد من فريق ألفا سكواد المكون من أربع جنود و مهمتك أنك توصل لفيزارى و تقبض عليه " و خالتى و خالتك و أتفرقو الخالات " .



الجيم بلاى:

الكونترول فللعبة أوفر وهمى , الحركة فاجيم سلس تماما لدرجة أنك حتنسى أنك بتلعب بلأنالوج .

فلوان بلايرحيبقى معاك شخصيات من الفريق بتساعدك و أنت بتلعب. الأيه أى بتاع الشخصيات حيخليها تدافع عنك و أنت بتهجم و تقتل معاك الوحوش و هى بتهجم عليكو " بس طبعا حضرتك حتشيل نصيب الأسد فلموضوع , إنت راجل دافع برضو "


الأيه أى بتاع الهيلجاست برضه مش سهل , الوحوش ليها طرق مختلفة فلهجوم و كل وحش ليه استراتجى معينة , ده غير انهم بيلعبو تيم ورك مع بعض و عشان كده اللعبة حتحتاج منك شوية استراتجى لأنك مش حينفع تفتح صدرك و تخش فيهم عنتر شايل سيفه , لازم أنك تحتمى بأى حاجة وأنت بتحارب عشان تقلل نسبة الضرب .


الأسلحة جامدة جدا فللعبة , لكن و مع الأسف أنت مش حتقدر تشيل أكتر من سلاح واحد main و مسدس و خنجر و أربع قنابل " و قوم يا مصرى "



من الواقعية فللعبة أن الأسلحة وقت الرى لود بتعها بيختلف من سلاح للتانى على حسب نوع السلاح.

بتركب أنسان ألى و عربيات بس مش كتير , لكن التحكم فيهم واقعى جدا.

أستخدام السيكس أكسيس فى اللعبة محدود و فحاجات مش مؤثرة فللعب " زرع قنابل مثلا "

من الحاجات برضه الجامدة أنك حتلعب فى ظروف مختلفة , يعنى حرب فى أرض مفتوحة و أحيانا تقع فى كمين و تبقى محاصر , أحيانا تتزنق فحتة ديقة و هاتك يا ضرب من كل حتة .


الجرافيكس :

اللى منكم شاف الأعلان أو الجيم بلاى حيلاظ أن مستوى الواقعية فلتجسيم عالى جدا جدا , الأشخاص تفاصيلهم دقيقة و واضحة و إنفعلاتهم واقعية. أما بلنسبة للبيئة المحيطة فلصحرا ء و أنت بتلعب و الرمل بيحجب عنك الرؤية و الرصاص بيتضرب فلأرض أو على الأشياء , الناس و هى بتتصاب و تموت جنبك أو لما تضرب فليم ثروار على خصم و تشوف التفاصيل و هو بينصهر. الجرافيكس حتنجح تماما أنها تدخلك فمود الجيم و تعيشك الأحداث فعلا .




الصوت:

الأداء الصوتى فللعبة للشخصيات عامة عادى جدا , لكن الشخصية الوحيدة اللى صوتها فعلا قوى هو فيزارى " أيوة , هو اللى أنت أفتكرتو كومبرس فأول اللعبة "

الساوند إفكت و التراكات تشدك و أنت بتلعب و حتخليك ديما مترقب و قلقان ليكون الصوت جاى من حتة أنت مش شايفها .

النت ورك :

بصراحة أجمد نتورك لعبته فى شوتينج جيم لغاية النهاردة . الرومز كتير و مترتبة حسب الريجون يعنى لو عايز تلاعب عرب يبقى تختار شرق أوسط لو عايز تلاعب أجانب يبقى أوروبا و هكذا.

الروم بتشيل لغاية أتنين و تلاتين بلاير مقسمين على فريقين , ممكن تلعب كذا مود ذى ديث ماتش أو فى مود جامد أسمه أسساسينيشن و هو أن الكمبيوتر بيختار و احد من الفريقين يبقى الهدف و مطلوب من فريقه يحميه و من الفريق التانى يقتلو و فى كمان كذا مود تانى .

اللعبة واخدة متوسط تسعين% من أكتر من ستين ريفيو من مجلات بلاى ستيشن .

الرأى الشخصى :

سونى و جوريلا بدائو جيل جديد من ألعاب الشوتينج و نجحو فعلا فى أنهم يتميزو على كل ألعاب نفس الفئة فكل الأجهزة .

اللعبة دى لازم أى حد بيحب الشوتينج يلعبها و فى رأى أن سونى بلجيم ده أخدت خطوة كبيرة فى أتجاه أنها تكون أفضل جيمينج كونسول.



أتمنى أنى مكنش طولت عليكو و أشوفكو فى تقرير تانى إن شاء الله .