ريفيوهات الألعاب

اللعبة دي يا جماعة من أقوي و أجمد ألعاب الرعب القليلة اللي نزلت علي PS3. و أنا "و أعوذ بلله من كلمة أنا" حبيت أعمل عنها تقرير
علشان في ناس كتير متعرفش عن اللعبة دي آي حاجة.

بأختصار ، لو أنت جبت لعبة silent hill + فيلم the grudge و عملتلهم mix ، حتطلع لعبة siren. و بكدة يكون خلص تقرير اللعبة و سعيكم مشكور ، ايه؟؟ الكابتن اللي هناك عايز يعرف أكتر!!! ، علشان محدش يقول بترغي كتير أنتو اللي بتطلبو :)

القصة :

مجموعة فريق عمل تليفزيون راحت تصور حلقة عن مدينة كانت معروفة بممارستها للسحر الأسود و تقديم القرابين البشرية " عايزين احنا شوية قرابين من دول فل79 مليون اللي عندنا"

الأحداث بتبداء لما الفريق و هو بيجهز للتصوير بيلاقي مجموعة من الزومبيز shibito معاها بنت عايزين يقتلوها ، و بيظهر واحد بيحاول ينقذها ،و الشيبيتو بيطاردوه و يلاحظو الفريق اللي بيحاول يهرب من المكان، و تبدء اللعبة.

الجيم بلاي :


اللعبة مكونة من 12 فصل ، و في 5 شخصيات حتلعب بيهم علي مدار اللعبة، اللعبة صعبة و حتحتاج ستراتيجي علشان تعدي لأن في مراحل حتبدئها من غير سلاح و في شخصية بنت صغيرة مبتشلش أسلحة أصلا !! فحتحتاج أنك تستخبة من الشيبيتو و تكمل المهام بتعتك من غير ما تتشاف.

الأحساس و أنت بتتسحب من ورا الشيبيتو و تحاول تعدي من جنبو من غير مايشوفك أو لما يتلموا عليك و تحاول تهرب منهم "و ستفشل فشلا زريعا " كل ده حيخليك متوتر و أنت بتلعب. و للعلم إن الشيبيتو من أرزل خلق الله ، مش علشان شكلهم وحش و لا علشان ممكن يصتادوك وأنت خلاص في آخر المرحلة...حتضرب الشيبيتو من دول لما حتقطعو و يقطع النفس و بعد كام دقيقة حتلاقيه حيا يرزق تاني وهكذا...و ده طبعا لمصلحة سعادتك لأنه بلأضافة إنك مش حتبرطع و تاخد راحتك فلمرحلة. فأنت حتتفاجيء بيهم كل شوية " مش أنت دافع علشان تتخض !! خد عندك بقي "

الشيبيتو أنواع و مقامات في اللي ماشي علي الأض واللي ماشي علي السقف و اللي بيطير "زيهم زي الناس عندنا بلضبط" و كل واحد و له طريقة فاللعب و الهجوم.

اللعب فكذا موود، ممكن يبقي،معاك سلاح فليد خير من عشرة علي الشجرة، لو حتلعب بالبنت يبقي مفيش أسلحة ، لو معاك حد يبقي لازم ميموتش، التنويع ده حيخليك متزهقش من اللعبة.معاك خاصية sight jacking و دي حتساعدك أنك تحدد مكان الشيبيتو أو تشوف اللي هما شايفينو.

اللعبة طويلة مع إن أول كام مرحلة حيجرو بسرعة بس حتصعب فلمراحل اللي بعد كدة.

الجرافيكس :

زي ما قولت فلأول أن اللعبة وخده كتير من جو silent فموضوع الكشاف اللي بتشوف بيه أو صوت السارينة و الجو العام فمعظم المراحل حيفكرك بsilent hill. أما بلنسبة للشيبيتو فالcharacter Artمتاخد بشكل كبير من فيلم Grudge سواء فلحركة أو فلشكل.

المعالم فلمراحل و تعبيرات الشخصيات واقعية و واضحة و تصوير مشاهد الحرب مع الشيبيتو الأداء الحركي فيها عالي جدا.

الصوت :

الأداء الصوتي يعتبر عادي و الموسيقي التصويرية جيدة.

التحكم :

التحكم سهل بس حتحتاج تتعود عليه و خصوصا فلمعارك اللي فيها أستخدام للsix-axis.

الرأي الشخصي :


اللعبة ضرورية لكل عشاق الألعاب المرعبة و هي من الحصريات الخاصة بلps3. ولأني مش من المعجبين بsilent hill 5 و في رأي أنها كانت مخيبة للتوقوعات، فأنا بعتبر siren هي silent hill الps3. اللعبة كانت علي psn و كانت للps3 الياباني فقط ، و لكن بعد النجاح اللي حققته تم إصدار نسخة blu-ray و ترجمتها للإنجليزيه.

مجلة ign آدت تقييم 8.4.

تحذير هام جدا : متلعبش اللعبة لوحدك من الأفضل يكون حد معاك، ليه؟؟ ، علشان لو واحد من الشيبيتو قل بأصلو و طلع عليك يبقي في حد جنبك...طب واللي جنبي ده حيعملي ايه فلموقف ده يعني ؟؟...سؤال رائع، بص يا بيه " لو وقف جنبك و صوت معاك يبقي واد جدع و صاحبك و كفاءة و هتموتو مع بعض، أما لو فلق و طلع يجري، يبقي حتعرف "لو ربنا كتبلك عمر يعني" أن الواد ده كان مصاحبك علشان الps3 بتاعك...:)

شوفو الفيديو ده : Siren Blood Curse Trailer

أشوفكم إنشاء الله علي خير في تقرير تاني.